TROPA DE ELITE 2

Acaba de ser estreada no Brasil este pasado venres 'Tropa de Elite 2', continuación da magnífica película dirixida hai 3 anos por José Padilha e gañadora do Oso de ouro do Festival de Berlín 2008.




Xa veremos o que tarda en ser estreada por estes lares... pero de seguro pagará a pena a espera: conta có mesmo reparto da primeira entrega (Wagner Moura, André Ramiro, Maria Ribeiro...) máis Seu Jorge (Cidade de Deus, Casa de areia) no papel de Beirada, dirixente dunha revolta nun penal brasileiro, e as críticas veñenlle xa ben positivas (ler por exemplo blog amalgama).

Os que vichedes a primeira parte xa vos empeza a tardar en ser estreada, non si...?

FRIOL, 1979

Impagable documento o recollido esta semana no blog terrasdefriol.blogspot.com. A vida duns rapaces nunha aldea galega (pareceume ver a Balbino no video?), aló polo ano 1979, emitido daquela por RTVE. Son o único que pensa que ese país xa non existe? Moito mudamos, xa o dixen noutra ocasión... o sorprendente é que teñamos mudado tanto en tan pouco tempo.

'Unha cápsula de tempo da Galiza de fins dos anos 70' a define Diego, que nos envía a ligazón.

"Hai partes que poden lembrar algunhas cousas da vosa infancia. Eu, por exemplo, lembro que tiña mestras moi parecidas cando era máis pequeno (afortunadamente deixei de telas), e que a xente falaba o castelán moito peor (agora iso é o que pasa co galego, e aínda hai castelanfalantes que se queixan). Os que sodes de zonas rurais veredes que moitas cousas poden ser doutro xeito, outras igual non. Ante todo hai unha cousa que me incomoda do vídeo e rápido o descubriredes: TVE, igual que fai agora, describe unha Galicia na que se sabe que se fala galego, pero pouco se demostra (e, pola contra, nese video a maioría serían galegofalantes). En calquera caso, unha cápsula do tempo da Galiza de fins dos anos 70".

Grazas a Diego, e ao blog terrasdefriol.blogspot.com por ter subido o video á rede.

GUIA PARA AS ELECCIÓNS NO BRASIL

Hoxe é xornada electoral á Presidencia do Brasil. Estes son os datos esenciais para seguir e entender as eleccións brasileiras:

• Cada elector(a) debe escoller cinco candidatas(os): Presidencia da República, Senado Federal, Cámara dos Deputados, Gobernador(a) estadual e Parlamento estadual.
• Vótase en urnas electrónicas, polo que o escrutinio de resultados é moi veloz. Comezarán a ser divulgados a partir das 21h. de Galiza, e dúas horas despois xa deben coñecerse resultados ben definidos.
• Para seguir os resultados en tempo real, é preciso instalar un aplicativo Java disponible neste enderezo ou seguir as noticias dos múltiplos xornais e blogs que farán unha cobertura online. Nós recomendamos o seguimento do equipo 48h. democracia.
• Análises intelixentes desde a esquerda brasileira, en revistas como Carta Capital ou en blogs como o do Paulo Henrique Amorim.

----------------

Extraído do blog renovarobng. Podes ler artigo completo e + información en
http://renovarobng.blogaliza.org/eleccion-historica-no-brasil