DOUS DISCOS, UNHA LAVANDEIRA

"... e a luz dunha nova alborada nacerá no Brasil" - Albino Núñez
Carlos Núñez, 'Alborada do Brasil'.

Portada de 'Alborada do Brasil. Fonte: www.carlos-nunez.com

Hai ben pouco que merquei o novo disco de Carlos Núñez, 'Alborada do Brasil', onde a música galega e a brasileira fúndense co saber facer deste músico excepcional. Por iso precisamente, porque hai ben pouco que o merquei, deixemos que madure. Pero dende logo promete ser fonte dalgún artigo neste blog xa que, adicado á cultura galega, portuguesa e brasileira, vaille como anel ó dedo.

Do seu novo disco e a súa relacion có Brasil déixovos coa miña recomendación de que o merquedes, e coa Entrevista a Carlos Núñez en El Pais, hai un par de meses, onde conta a súa experiencia e comenta cousas como "A miña intuición como artista é que Galicia no Brasil funciona" ou "Brasil é moito mais galego que lusitano, e ese é un potencial aínda non codificado de forma política".

Hoxe falaremos, en troques, da lavandeira.


Romance da lavandeira - Fuxan os ventos

No disco 'Quen a soubera cantar', Fuxan os ventos sinalan que "nas creencias galego-portuguesas existía un castigo, o máis duro, prós pecados feitos contra da comunidade. Un dos máis grandes era atentar contra a vida dos meninos antes ou logo de naceren. Quen esto facía era condenada a lavar, á beira de ríos, sábanas e panos de nenos. Cando alguén tentaba axudarlles a lavandeira desaparecía e quedaba no seu lugar unha poza de sangue".

A lavandeira da noite - Carlos Núñez & Noa

En cambio, no disco 'Os amores libres' de Carlos Núñez, a explicación é algo máis ambigua: "fálanos da soedade femenina nun trance doroso, o lavar o pecado, o sinal dun amor prohibido. Onte e hoxe, a invisibilidade da muller marxinada".

Con Fuxan os ventos e Carlos Núñez abránguense 4 décadas da mellor música tradicional galega, dende os primeiros anos 70 cando Fuxan os ventos comezaba a súa andaina, ata a actualidade, coa carreira artística do posíbelmente maior expoñente da nosa música no exterior, Carlos Núñez.

'Quen a soubera cantar', quinto álbum de Fuxan os ventos (1981), foi publicado segundo wikipedia "coa editora Ruada, nun intento de apoiar o primeiro selo discográfico galego".

Portada de 'Quen a soubera cantar'. Fonte: www.galego21.net

Nel atopamos, no primeiro corte do disco, o que posíbelmente é -xunto con 'sementeira'- o tema máis emblemático da banda: 'O meu amor mariñeiro', adaptación dun poema do portugués Manuel Alegre.

De 'Os amores libres' (1999) destacar por exemplo 'Maria Soliña', tema do que xa falamos neste blog non hai moito, ou a potente e festeira 'Jigs & Bulls', entre os varios temas do álbum onde Carlos mistura a música tradicional galega con outros folclores:

"No mapa secreto das tabernas, hai unha submariña entre Irlanda, Galicia e Andalucía".

- Web oficial de Fuxan os ventos: www.fuxanosventos.net/
- Fuxan os ventos en wikipedia: gl.wikipedia.org/wiki/Fuxan_os_Ventos
- Web oficial de Carlos Núñez: www.carlos-nunez.com onde podedes atopar información do seu último traballo, 'Alborada do Brasil'.
- Carlos Núñez en wikipedia: gl.wikipedia.org/wiki/Carlos_Núñez

Grazas a María pola idea.